Zur Ehrig vor Babs Aeschlimaa

A Alpigle isch zwar ds Hus vom TV, aber mir Skiclübler hi de mengisch dörfe ds Gaschträcht gniesse. So bir Fackuabfahrt zum Apéro u natürlech a üsne Clubrenne. Da trifft me sech de aube scho am Morge, u es git vei e chli lut zue. Si het de ab u zue müesse iri chli lüteri Prüefigsexperte-Schtimm fürene, dass ire o aui zueglost hi. D Dadruber chümer no lang diskutiere, weles dass äch ir Gmind ds wäutbeschte Schigebiet isch. Si het dert mit ihrem Ma sicher no chli heftiger müesse diskutiere aus menge andere, wiu är isch ä Schwandner. Aube is het si de haut wou oder übu müesse nachigeh, u o ds Schwande es paar Fahrte mache. I Immer im Schuss isch si igentlech fasch geng u o geng gsi. So het si während ihrer Zyt im Clubvorschtand no ä Zweitusbiudig gmacht, mengisch si de sogar grad Blitz- Vorschtandssitzige ir Gärtnerei abghaute worde. O mit em Training für d' Bike tuure isch si geng chli i ds trible cho, iri bevorzugti Trainingsstrecki Schwande-Sigriswiu isch de äbe o mischtens so gsi, u nid Sigriswiu-Schwande, di cheibe Budeouto si haut aube am Abe gäbig gsi, für ds Velo i ds lade. E Erschte Ugscht isch fasch chli zu ihrem Chind worde i de letschte Jahr. Mir Vorschtandskollege hi aube gstuunet, wi eifach am nami am zwü aus losgange isch u aus isch gliferet worde u aus het klappt, fasch chli wi magisch. O am zweite zum Ufruume isch si geng derbi gsi, nid säute het si de ihres ganze Rägezüüg müesse füreneh. So het me se mit Gummistifu, Rägehosi wo geng chli gross gnue si gsi, Rägejagge u mit eme grosse Huet atroffe, wäger geng isch si aus erschti dert gsi. Mir lö se o nume la gah, wiu si üs versproche het, dass si am erschte Ugscht o witerhin no chli hiuft, am Chare ds schriisse. P Presipflicht isch Jahresbricht, dä isch geng sehr usfüerlech u underhautsam gschribe worde. Di letschte Wort im Jahresbricht si de mischtens "Schiheil u ä gfröiti Zyt" gsi. O ar HV gits so nes tüpisches Schlusswort vo ihre, nämlech: " i wünsche öich ä schneerichi u unfaufreii Saison". Presipflicht isch o ds Mutationswäse vom SSV. Da het si sech äuä scho tuusig mau gergeret drüber, wi autertümlech doch das Syschtem mit dene Charte isch. R Rigle si i ihrer Amtszyt o meh aus iinisch äs Thema gsi. Me het die aube müesse verchuufe für ä Nachwuchs vom BOSV. Si het das geng sehr guet g' managt, sogar ar Kasse ir Gärtnerei het si se verchuuft. Der Nachwuchs isch ihre geng am Härz gläge, sigs clubintern ir JO, aber o uf regionaler Äbeni. Si hät sicher o sehr Früd, wes de ir Schwiz ummi is äs jungs Vreni Schneider oder ä junge Mike vo Grüenige gäbti. E Eduwiss u Enzian gseht si lieber ir freie Natur, aus dass si züchteti Exemplar dervo verchuuft. Si isch sehr Naturverbunde, mir hi das o geng gmerkt mit Gruess-SMS wo vo aune mügleche Höger uf üsi Handy gschickt worde si. So chömemer de o grad nahtlos zum S Skiweekend Zermatt. Mengisch isch si mit ihrem Ma sogar scho ä Tag früecher gange, wiu Zermatt isch scho chli ä Liebi vo ihre. U wes de öppis git, wo si nach Ihrer Vorschtandszyt wird vermisse, so isches äuä scho das verlengerete Wuchenend im Sumer mit Wanderige, Schiine u Chinoise. I Interns Familieduell het si vor auem a de Schirenne geng ka, dert hät si ihri Schwoscht scho gärn is gschlage, aber so wi mier üs hi chönne Erinnere, het si das nie gschafft. O imene andere Duell muess si hinder ihrer Schwoscht zrugg schtah, si hets nämlech nie gschafft, ihre Maa zum Clübler z mache. Im Gägesatz zu ihrer Schwoscht, di het is scho zwee bracht… Christine Kämpf; Ursula Michlig; Ursula Zobrist Sicher hit dier aui gmerkt, dass es sech hie um üsi scheidendi Präsidentin Babs handlet. Si isch 1988 i Schiclub itrtäte, im 1994 isch si de aus Kassierin gwählt worde. Das Amt het si bis 1999 usgfüehrt u denn het si sech när zur Verfüegig gschteut, erschti Präsidentin vom Schiclub z wärde. Mir möchte ihre itz gärn ä Vorschprung im Gschwüschterti-Duell mit uf ä Wäg geh, mir schlöh öich nämlech vor, d' Babs für ihri ganze gleischtete Verdienschte für ä Schiclub Sigriswiu zum Ehremitglied z' ernenne. >> Fotogalerie - Hauptversammlung im Adler Sigriswil, 05.11.2005